Monthly Archives: ديسمبر 2015

بساطة وعظمة .. وبدون تناقض

  
هذا الإعلان دائماً نفكره يصير للناس مو لنا! 
الله يغفر لها ويرحمها.. كنت دائما أجننها وأتحرش فيها وتقول لي وهي تبتسم وتعاتبني وتحرك السبابة اليمين (أنا أحبش ياجوهرة لاتخليني أزعل عليش) أضحك وأستسمح منها و أرجع أعيدها معها مرة ثانية!. أتوب مع الناس كلهم ومعها ما أتوب.

 

قلبها طيب مايعرف الحقد ولا الحسد. إذا في خاطرها عليك بتقول لك في وجهك. عمري ماسمعتها تكلمت في أحد من وراه على سبيل الغيبة.. أبدا أبدا.. ملهمة في حفظ اللسان الله يغفر لها. 
مرة أخذت شنطتها بالخبر أوصلها للمصعد ويوم وصلت بلكونة أمي منيرة يم المصعد قالت لي (تعبتش يابنت أختي) رديت عليها ياخالتي أناتعبت نفسي عشان البخشيش ترى! وتسايرني الله يغفر لها وتقول لي كم يعني؟ أقول لها مليون ياخالتي ولا يجي أقل! (الله يابنت أختي أثرش طماعة) ترد علي وهي تضحك وكملت عبارة لها عن نفسها مشهورة يعرفونها البنات و مشت عليها الله يسعدها. عندها روح فكاهة عذبة وكثير من عباراتها لازلنا نكررها بينا ونضحك منها. 
سبحان الله.. أعداد المعزين فيها تبين محبة هالقلب الكبير حتى بعد طلعتها من الأحساء.. وحتى بعد بعدها عن الناس فترة مرضها. مانسوها.. لأن ربي قال في محكم كتابه (هل جزاء الإحسان إلا الإحسان).
كنت أستغرب من بعض المعزيات اللي من بعيد يكلموني يقولون لي خالتك كانت و كانت.. ويصفونها بدقة! مع إنها مو من سكان الشرقية ولا هي من عمر خالتي ولا قريبتها حتى!

الله يغفر لك ياخالتي حصة..

تركت مكان يصعب ملؤه .. لكن أملنا بالإجتماع بك في فردوسه الأعلى إن شاء الله 

Advertisements
مصنف